«Լավրովը Հայաստան գալիս է ոչ թե պատասխան ստանալու համար, այլ իր այցն է, որտեղ քննարկվելու է մեր հարաբերությունների լայն շրջանակ»,- կառավարության այսօրվա նիստից հետո լրագրողներին ասաց արտաքին գործերի փոխնախարար Շավարշ Քոչարյանը:
Հարցին, թե Արցախի հարցում Հայաստանի պաշտոնական դիրքորուշումը ո՞րն է այսօր, նա պատասխանեց. «Հայաստանի պաշտոնական դիրքորոշումը չի փոխվել, ավելին ասեմ, ներկա իրավիճակում անհնարին է հաշվի չառնել Ադրբեջանի այն կեցվածքը, այն ագրեսիան, որը նրա իրականացրեց , և բնական է, որ բանակցային ապագա գործընթացը պետք է ելնի հետևյալից: Առաջինը, պետք է երաշխավորված լինի կրակի դադարեցումը, որովհետև երբ որ կրակում են, անհնար է բանակցել: Այսինքն՝ զինադադարը պետք է հստակ լինի: Հաջորդը, պետք է հաշվի առնել, որ գործ ունենք մի սուբյեկտի հետ, որն ի հակառակ իր իսկ ստանձնած միջազգային պարտավորության, կարող է խախտել: Հետևաբար, ցանկացած փուլում նա կարող է հետ կանգնել իր ստորագրություից: Այդ բոլորը պետք է հաշվի առնել, երբ խոսքը վերաբերում է կարգավորման գործընթացին»:
Շավարշ Քոչարյանի խոսքով՝ այն ինչ առաջարկում են համանախագահները, իհարկե, դա հայկական կողմի երազանքը չի եղել, բայց հիմքում ընկած է եղել փոխզիջումային տարբերակը:
«Ավելին ասեմ, այնտեղ կա, այսպես ասած, հետաձգված հանրաքվեի գաղափարը: Իհարկե, տարօրինակ է, երբ որ արդեն եղել է հանրաքվե, և ԼՂ ժողովուրդը լիովին համապատասխանել է միջազգային իրավունքին, ժամանակին կազմակերպել է հանրաքվեն, իր կամարտահայտությունը հստակ արտահայտել է: Ո՞րն էր իմաստը հետաձգված հանրաքվեի»,- ասաց նա: Ըստ միջնորդների, Քոչարյանի խոսքով, դա ուղղված էր նրան, որ Բաքվի իշխանությունները կարողանան փրկել իրենց դեմքը և ժամանակ ունենան, որ մատուցեն իրենց ժողովրդին դրա անհրաժեշտությունը: Բայց այս ժամանակահատվածը ցույց տվեց, որ Բաքուն ոչ թե օգտագործում է այդ ժամանակը իր ժողովորդին բացատրելու համար դրա անհրաժեշտությունը, այլ գործել է հակառակ ուղղությամբ: Սա արդեն, ըստ Քոչարյանի, ստիպում է այդ հարցում բանակցել այլ մոտեցումների մասին:
«Չի կարող լինել որևէ նոր մոտեցում, որն Ադրբեջանը կարող է ընկալել որպես իր իրականացրած ագրեսիայի խրախուսում: Եվ այդ հարցում մենք պետք է լինենք հետևողական»,- ասաց նա:
Աղբյուրը՝ lragir.am
