Լեռնային Ղարաբաղի Հանրապետությունը պատրաստ է կառուցողական բանակցություններ սկսել Բաքվի հետ և փոխզիջումների գնալ, երբ Ադրբեջանը պաշտոնապես կճանաչի մեր անկախությունը, ասել է Մոսկվայում ԼՂՀ պաշտոնական ներկայացուցիչ Ալբերտ Անդրյանը:
«Մեր դիրքորոշումը միանգամայն հասկանալի և թափանցիկ է. ճանաչեք մեր անկախությունը և մենք պատրաստ ենք նստել բանակցությունների սեղանի շուրջ ցանկացած հարցի վերաբերյալ», - նշել է նա:
Սահմանային վերջին իրադարձությունները ցույց տվեցին, որ ղարաբաղյան հիմնահարցի ուժային լուծում չկա: «Ռազմական գործողությունները միայն ավելացնում են երկու կողմերի զոհերի թիվը և խաղաղ բնակչության տառապանքները: Բանակցություններին այլընտրանք չկա: Արցախի ժողովուրդը կատարել է իր ընտրությունը և չի լքի իր հողերը, սակայն մենք չենք ցանկանում անընդհատ պատերազմել», - նշել է ԼՂՀ պաշտոնական ներկայացուցիչը, հաղորդում է Ինտերֆաքս գործակալությունը։
