ՌԴ նախագահ Վլադիմիր Պուտինն անտեսելով ընդունված դիվանագիտական արարողակարգը՝ անձամբ կանչել է Մոսկվայում Թուրքիայի դեսպան Ումիթ Յարդմանին և զգուշացրել, որ Ռուսաստանի Դաշնությունը կխզի դիվանագիտական հարաբերությունները Թուրքիայի հետ, եթե նախագահ Ռեջեբ Թայիփ Էրդողանը չդադարի Սիրիայում աջակցել ԻՊ ահաբեկիչներին:
ՌԴ նախագահը խստորեն քննադատել է Թուրքիայի արտաքին քաղաքականությունը և մեղադրել Էրդողանին՝ Ալ Քաիդայի ահաբեկիչներին Սիրիայում, Իրաքում եւ Եմենում աջակցելու համար, գրում է The Moscow Times թերթը:
Հանդիպումն ընթացել է փոխադարձ մեղադրանքների մթնոլորտում: Թուրքիայի դեսպանը չի ընդունել մեղադրանքները, նա իր հերթին մեղադրել է Ռուսաստանին՝ Սիրիայում դաժան ու երկարատև քաղաքացիական պատերազմ հրահրելու համար:
Երկու ժամ տևած հանդիպման վերջում Պուտինը դեսպանին ասել է․«Ասեք նաև ձեր բռնապետ նախագահին, որ նա իր ԻՊ ահաբեկիչների հետ կարող է հայտնվել դժոխքում: Այնպես որ, ես այլ բան անել չեմ կարող, քան Սիրիան վերածել նոր Ստալինգրադի՝ Էրդողանի և նրա Սաուդյան դաշնակիցների համար, որոնք ավելի չար են, քան Ադոլֆ Հիտլերը։ Ձեր նախագահն այնքան երեսպաշտ է, որ մի կողմից հանդես է գալիս որպես ժողովրդավարության պաշտպան և խստորեն քննադատում է Եգիպտոսում զինվորական հեղաշրջումը, իսկ մյուս կողմից՝ Սիրիայի նախագահի դեմ ահաբեկչական գործողություններ իրականացրած հանցագործներին ազատում է պատասխանատվությունից»։
Այնուհետև ՌԴ նախագահը հայտարարել է, որ երկիրը չի հրաժարվելու Սիրիայի օրինական իշխանությանն աջակցելուց և համագործակցելու է իր դաշնակիցների՝ Իրանի և Չինաստանի հետ, որպեսզի քաղաքական լուծումներ գտնեն Սիրիայում ծավալված անվերջանալի քաղաքացիական պատերազմին վերջ տալու համար, որը 23 միլիոն արաբ ժողովրդին մխրճել է էթնիկական և կրոնական անարխիայի մեջ։
