Հայաստանը նաև իր պատրաստակամությունն է հայտնել ՄԱԿ-ի հովանու ներքո խաղաղապահ գործողություններ իրականացնող մասնագիտացված ուժեր տրամադրելու հարցում:
Անդրադառնալով հայ-ամերիկյան համագործակցությանը՝ ռազմական ոլորտում և հայ-ռուսական սերտ հարաբերություններին, պաշտպանության փոխնախարարն ընդգծել է, որ այդ հարցում որևէ հակասություն չկա, Միացյալ Նահանգների հետ համագործակցությունը Հայաստանի անվտանգության բաղադրամասերից մեկն է։
«Ամերիկայի հետ համագործակցությունը փոխլրացնում է հայ-ռուսական համագործակցությունը», ասել է Դ․Տոնոյանը։
ԱՄՆ-ը շահագրգռված է ԼՂՀ հակամարտության գոտում զինադադարի պահպանմամբ
Պաշտպանության նախարարի առաջին տեղակալ Դավիթ Տոնոյանը Վաշինգտոնում հանդիպումներ է ունեցել ԱՄՆ պետքարտուղարության և Պենտագոնի ներկայացուցիչների հետ:
Միացյալ Նահանգները շահագրգռված է ղարաբաղյան հակամարտության գոտում խաղաղության պահպանման հարցում և պատրաստ է աջակցել կանխարգելման համապատասխան մեխանիզմների ներդրմամբ:
«Բանակցությունների ընթացքում թե՛ Պենտագոնում և թե՛ Պետքարտուղարությունում կարծում են, որ անհրաժեշտ է ուժեղացնել բոլոր միջոցները, որոնք կարող են կանխարգելել իրավիճակը ռազմական ուղիով լուծելու գործողությունները»,-ասել է փոխնախարարը:
Կանխարգելման հնարավոր միջոցների թվում Դավիթ Տոնոյանը նշել է միջազգային դիտորդներին սահմանային միջադեպերի հետաքննություն իրականացնելու մանդատի շնորհումը, ինչը թույլ կտա կանխել զինադադարի խախտումները, պատժել մեղավորներին:
Մեկ այլ մեխանիզմ է զորքերի շփման գծում միջազգային դիտորդների հովանու տակ հսկող և դետեկտորային համակարգերի տեղադրումը, ինչը հնարավորություն կտա հասցեագրել զինադադարի խախտման յուրաքանչյուր դեպք։
Անդրադառնալով Վաշինգտոնում քննարկված այլ հարցերին, փոխնախարարը նշել է, որ Միացյալ Նահանգների հետ Հայաստանը համագործակցելու է պաշտպանության ոլորտում բարեփոխումներ իրականացնելու և հայ խաղաղարարների աշխատանքն ապահովելու ուղղությամբ: Ներկայումս հայ զինվորները խաղաղություն են պահպանում Աֆղանստանում, Կոսովոյում և Լիբանանում, իսկ շուտով կարող են մեկնել նաեւ Մալի:
