«Էթնիկական և մշակութային համագործակցության կենտրոնի» ՀԿ ղեկավար Սաշիկ Սուլթանյանը և «Շամս» մարդասիրական կազմակերպության ղեկավար Ռուստամ Բակոյանը եռօրյա հացադուլ են իրականացնում ՄԱԿ երևանյան գրասենյակի առջև։

Իրաքի եզդիները մշտապես ենթարկվում են արմատական խմբավորումների հարձակումներին։ Հայաստանում, ԼՂՀ-ում և Վրաստանում բողոքի բազմաթիվ ակցիաներ են անցկացվել, պահանջելով օգնել Իրաքի եզդիներին։

Սաշիկ Սուլթանյանն ու Ռուստամ Բակոյանը ասել են, որ հացադուլի նպատակն է․ «ՄԱԿ-ից պահանջել, որպեսզի այդ կառույցը բոլոր ուժերը ներդնի Հյուսիսային Իրաքում եզդիների կոտորածը դադարեցնելու համար, նաև պահանջում ենք, որ ՄԱԿ-ը համագործակցի գերության մեջ գտնվող մոտ ինը հազար եզդու գերությունից ազատելու գործում»։

Ռուստամ Բակոյանը պատմում է, որ գերված եզդի կանանց վաճառում են արաբական շուկաներում։ «Այս ամենը նվաստացուցիչ է, կանանց գնահատում են ըստ մաշկի գույնի և տարիքի։ Նրանց վաճառում են 15 -200 ԱՄՆ դոլարով», -հայտարարում էր Ռուստամ Բակոյանը։

Ռ․Բակոյանն ու Ս․ Սուլթանյանը պահանջում են, որպեսզի ՄԱԿ-ի Անվտանգության խորհուրդը միջոցներ ձեռնարկի «Շանգալի շրջանում ինքնավարություն ստեղծելու համար, որպեսզի ապահովվի Հյուսիսային Իրաքի եզդիների անվտանգությունը»։ Իրենց ինքնավարությունում եզդիները կարող են պաշտպանել սեփական ժողովրդին ու տարածքը, պնդում էին նրանք։

Ակտիվիստները հայտարարել են նաև, որ պետք է բարելավվեն եզդի փախստականների ճամբարներում ապրելու պայմանները։ Բակոյանն ավելացրել է, որ «Շմաս» կազմակերպություն են դիմել 10 եզդի՝ Հայաստանում վերաբնակվելու ցանկություն հայտնելով։