ՀԱՄԿԿ նախագահ, ՀԱՄ նախագահ, ՀՀ հանրային խորհրդի անդամ Վազգեն Սաֆարյանը անդրադառնալով Եվրամիության գերագույն հանձնակատար Ֆեդերիկա Մոգերինիի Հայաստան կատարած այցին, իր մի քանի նկատառումներն է կատարել։
Առաջին՝ առաքելությունը պետք է ուղղված լիներ հակամարտության գոտում խնդրի հանգուցալուծմանը, հաջորդը` Հայաստանում 20 000-ից ավելի սիրիահայերի սոցիալական խնդիրների լուծմանը:
Ինչ վերաբերում է այն բանին, որ ՀՀ-ԵՄ հարաբերություններում ձգտում են, որ ԵՄ անդամ պետությունների բիզնես շրջանակները հետաքրքրվեն Հայաստանի ներդրումային միջավայրով, ապա հիշեցնեմ, որ Հայաստանը Եվրոպական միության անդամ երկրներին հիմնականում հումք է արտահանում, հումքային կցորդ երկիր է:
ԵՄ անդամ երկրները, եթե ցանկություն ունեն Հայաստանում ներդրումներ կատարելու, որպեսզի մենք եվրոպական երկրներ պղնձի խտանյութ չարտահանենք, այլ պատրաստի պղինձ կամ պղնձից պատրաստված իրեր, մասնավորապես մալուխներ և այլն արտահանենք, ապա մենք պետք է ողջունենք նման մոտեցումը: Պետք է ողջունենք այն քայլերը, որոնք ուղղված են Հայաստանում մեքենաշինության, սարքաշինության զարգացմանը, ողջունելի են, իհարկե, դրանց համար կատարվող ներդրումները։
ԵՄ անդամ երկրները կարող էին տեխնոլոգիաներ առաքել Հայաստան, և հայկական գիտատեխնիկական ներուժն օգտագործել, իսկ հայկական կողմն այդ տեխնոլոգիաներով արտադրանքներ կպատրաստի և կառաքի Եվրոպա:
Եթե ԵՄ-ն իր մղումների մեջ ցանկանում է օգտակար լինել Հայաստանին, ապա պետք է իր տեխնոլոգիաները փորձի ներդնել Հայաստանում՝ համատեղ բարձր տեխնոլոգիական արտադրանք արտադրելու համար։ Մենք ունենք գիտատեխնիկական մշակումներ և կարող ենք եվրոպական տեխնոլոգիաների ներդրման պարագայում ստանալ բարձր տեխնոլոգիական ապրանքատեսակներ: Այլ հարց է, թե Եվրոպան կցանկանա, արդյոք, որ Հայաստանը դառնա իր մրցակիցը և բարձր տեխնոլոգիական ապրանքներ արտադրել: Բնականաբար, Եվրոպան դա չի ցանկանա, նրանք միշտ ուզում են, որ մեր նման երկրները հումքային կցորդ մնան․սա է խնդիրը։ Իսկ կհաջողվի՞ մեզ ապացուցել եվրոպական երկրներին, որ մեր գիտատեխնիկական նվաճումները և ձեռքբերումները համատեղ ուժերով կարող ենք վերածել արդյունաբերական ապրանքատեսակների, սա արդեն կյանքը ցույց կտա:
Ինչ վերաբերում է ԵՄ անդամ երկրների հետ համագործակցության դեպքում ԵՏՄ անդամ երկրների հետ հավանական խնդիրների ծագմանը, գտնում եմ, որ ամենակարևորն այն է, որ բոլոր համաձայնությունները ԵՏՄ անդամ երկրների հետ կարողանանք պահպանել:
Այն, ինչ մենք անում ենք եվրոպական երկրերի հետ, դրանք չպետք է հակադրվեն ԵՏՄ անդամ երկրների հետ մեր ունեցած հարաբերություններին։
ՀԱՄԿԿ նախագահ, ՀԱՄ նախագահ, ՀՀ հանրային խորհրդի անդամ
Վազգեն Սաֆարյան
Հիշեցնենք, որ օրերս պաշտոնական այցով Հայաստանում էր գտնվում Եվրոպական միության արտաքին քաղաքականության և անվտանգության հարցերով բարձր ներկայացուցիչ Ֆեդերիկա Մոգերինին: Այցի ընթացքում Հայաստանի ղեկավարության հետ քննարկված հարցերը վերաբերում էին Հայաստան-Եվրամիություն երկկողմ հարաբերությունների օրակարգին, առանձին ոլորտներում համագործակցությանը, միջազգային արդի խնդիրներին, տարածաշրջանային զարգացումներին, մարտահրավերներին ու հեռանկարին:
Այցի ընթացքում ՀՀ-ԵՄ երկկողմ հարաբերությունների շրջանակում անդրադարձ է կատարվել նաև տարածաշրջանային արդի թեմաներին, որոնց հետ Հայաստանը անմիջականորեն առնչություն է ունենում:
Այդ հարցերից մեկը Սիրիայում ընթացող պատերազմի արդյունքում ստեղծված միգրացիոն ճգնաժամին և փախստականների հոսքերին առնչվող հարցերն էին։ Քննարկվել է նաև Իրանի նկատմամբ պատժամիջոցների վերացման արդյունքում ստեղծված իրավիճակը, որը համագործակցության լայն հնարավորություններ ու հորիզոններ է բացում Հայաստանի և Եվրամիության համար:
Եվ, ի վերջո, շատ կարևոր ևս մեկ արդյունք ունեցավ այս այցը: Դա Եվրամիության դիրքորոշման արտահայտումն էր Ղարաբաղյան հակամարտության առնչությամբ: Մոգերինին վերահաստատեց ԵՄ անվերապահ աջակցությունը Մինսկի խմբի համանախագահների՝ հիմնահարցի բացառապես խաղաղ հանգուցալուծման ուղղությամբ գործադրվող ջանքերին` եռանախագահների առաջարկած կարգավորման հայտնի մադրիդյան սկզբունքների հիման վրա, և հայտնեց, որ ԵՄ-ն սատարում է բանակցությունների հիմքում ընկած երեք սկզբունքները՝ ժողովուրդների ինքնորոշման իրավունքի, ուժի կամ ուժի սպառնալիքի չկիրառման և տարածքային ամբողջականության:
Այս ամենից կարող ենք եզրակացնել, որ Հայաստան-Եվրամիություն համագործակցությունը նոր և ավելի ամուր հիմքերի վրա է կառուցվում:
