ԶՕՐԱԿՑՈՒԹԻՒՆ ԼԻԲԱՆԱՆԱՀԱՅՈՒԹԵԱՆ ԸՆԴԴԷՄ ԹՐՔԱԿԱՆ ՀԱՅԱՏԵԱՑՈՒԹԵԱՆ ՎԵՐՋԻՆ ԱՐՏԱՅԱՅՏՈՒԹԻՒՆՆԵՐՈՒՆ

18 Հունիսի 2020

Արգենտինայի Հայկական հաստատությունների հաղորդագրությունը

 

Լիբանան կը գտնուի տնտեսական և ֆինանսական խոր տագնապի մը մէջ, և այդ կացութիւնը իր խոր ժխտական ազդեցութիւնը ունի տեղւոյն հայ համայնքին վրայ: Ոչ իսկ քաղաքացիական պատերազմի տարիներուն (1975 – 1990) համայնքային հաստատութիւնները գտնուած են իրենց դռները փակելու ստիպումի սպառնալիքին դէմ յանդիման: Պսակաձև ժահրի համավարակի պայմաններուն մէջ, համայնքը շատ արագ կազմակերպեցուեցաւ հայկական թաղամասերու բժշկական, պարէնային և այլ ամէն ձևի օժանդակութիւն հասցնելու համար: Համայնքի քաղաքական և կրօնական ղեկավարութիւնը դիմած է Սփիւռքին՝ խնդրելով օժանդակութիւն դիմակայելու համար օրհասական այս կացութիւնը:

Անցեալ 10 և 11 յունիսին, համայնքը թիրախ եղաւ նոր և շատ լուրջ սպառնալիքի մը: Հայազգի հաղորդավար լրագրող Նշան Տէր Յարութիւնեան, «Ալ-Ժատիտ» հեռուստատեսային կայանի իր ծրագրին ընթացքին, Թուիթըրի ճամբով ստացաւ հայհոյանքներ, որոնց շարքին իրեն «գաղթական» որակումը: Հաղորդավար- լրագրողը ուղղակիօրէն պատասխանեց այդ յարձակումներուն և ամբաստանութեան մատը յղեց դէպի Թուրքիա և նախագահ Էրտողան: Լրագրողի ելոյթին յաջորդեց հայատեացութեան արտայայտութիւններու ամբողջ տարափ մը, որուն մեծ մասը ոչ-լիբանանեան աղբիւրներէ կու գային: Այդ արտայայտութիւնները կարդարացնէին ցեղասպանութիւնը ըսելով, թէ «հայերը արժանի էին ջարդուելու»: Տեղի ունեցաւ թրքական դրօշակներով ցոյց նոյն հայատեաց արտայայտութիւններով, որոնց հեղինակները իրենք իրենց կը համարէին օսմանցիներու ժառանգորդներ և Էրտողանի հետևորդներ: Լիբանանի մէջ Արաբ Մերտինցիներու միութեան նախագահ Մունիր Հասան ի մասնաւորի օսմանցիները անուանեց իր «նախահայրերը» և ըսաւ որ «լաւ գործ ըրին հայերը ջարդելով»: Ան հայերը կոչեց «յիմարներ, դաւաճաններ, վատեր և անյարգալիցներ»:

Բարեբախտաբար լիբանանեան քաղաքական բոլոր շրջանակները իրենց զօրակցութիւնը յայտնեցին հայ համայնքին: Լիբանանի մէջ գործող հայ քաղաքական երեք կուսակցութիւնները միացեալ հաղորդագրութիւն մը հրապարակեցին դատապարտելով այս երեւոյթը եւ ինքնազսպումի կոչ ըրին հայ համայնքի զաւակներուն: Երեսփոխան Յակոբ Բագրատունի կոչ ուղղեց զուսպ մնալու և գրգռութեանց տեղի չտալու: Երեսփոխանը դատական հարց բացած է Մունիր Հասանի դէմ: Նոյնը ըրին Լիբանանահայ համայնքի բաղկացուցիչ հայ քաղաքական կազմակերպութիւններու ղեկավարները: Նամակներ յղուած են Պէյրութի օտար դեսպանութիւններու՝ զգուշացնելով հայատեացութեան այս նորագոյն արտայայտութեան դէմ:

Արժանթինի Հայ համայնքի զանազան հաստատութիւնները այսու կու գան համայնքին ամբողջական զօրակցութիւնը յայտնելու Լիբանանի մեր քոյրերուն և եղբայրներուն: Հայատեացութեան այս արտայայտութիւնները ինքնաբուխ չեն, այլ ներշնչուած և կազմակերպուած Անքարայի կողմէ եւ համահունչ են Թուրքիոյ ժխտողականութեան և նէօ-օսմանական նոր քաղաքականութեան Միջին Արևելքի մէջ: Սուրիոյ հիւսիսն ու Լիպիա իր զինուորական միջամտութենէն յետոյ, Էրտողանի վարչակարգը իր գործակալները և իր երաշխաւորած ու ֆինանսաւորած ծայրայեղական խմբակցութիւնները աշխուժացուցած է Լիբանանի մէջ ևս: Երկրի այս տագնապալի կացութենէն օգտուելով, Թուրքիա կը ջանայ հարուածել միջ-համայնքային համակեցութիւնը և թիրախաւորել հայութիւնը այնպէս ինչպէս թիրախաւորեց քիւրտերը Սուրիոյ մէջ:

Որպէս արժանթինցի քաղաքացիներ, ուշադրութեան կը յանձնենք մեր կառավարութեան թրքական հայատեացութեան այս նոր արտայայտութեան մասին ընդդէմ լիբանանահայութեան և միջազգային բեմին վրայ արժանթինեան դիւանագիտութենէն կակնկալենք ցեղապաշտական այս քաղաքականութեան դէմ յստակ յանձնառութիւն:

June 16, 2020

azg.am

2020-06-17 20:04:10

ԱՎԵԼԱՑՆԵԼ ՄԵԿՆԱԲԱՆՈՒԹՅՈՒՆԸ