Վ․Խաչատրյան․ «Որքա՞ն խաբենք մեզ, որ բան էլ չկա, որ բան էլ չի լինելու…»

03 Ապրիլի 2016

Երկու օրվա մարտական գործողությունների ընթացքում կասկածներ են առաջացել, որ ադրբեջանական կողմում կռվում են իսլամիստները։ Այս լուրը լիարժեք հերքել չկարողացավ նաև ԼՂՀ մամլո խոսնակ Դավիթ Բաբայանը։

Հետաքրքիր մեկնաբանություն է տվել կրոնագետ Վարդան Խաչատրյանը։ Լրագրողների հետ զրույցում նա ասել է, որ Ադրբեջանը կօգտագործի ջիհադականներին: «Այն, որ իսլամիստները մտել են Ադրբեջան, որ Նախիջեւանում են հաստատվել, որ Վրաստան էլ են մտնում անկաշկանդ, մի անգամ չէ, որ ասվել է: Թուրքիա են գնում մեծ քանակությամբ ջիհադականներ, որոնք Թուրքիայից ինչ-որ տեղ պետք է գնան։ Պատկերացնո՞ւմ եք` ուր կգնան..․ ուրիշ տեղ չեմ տեսնում, որովհետեւ մենք ունենք բաց դարպաս, հանձինս` Նախիջեւանի: Պարզապես Թուրքիան չի ուզում բախման մեջ երեւալ, սա թուրքական իշխանությունների վարքագիծն է` նաեւ ԻՊ-ի դեպքում: Եթե մեր դեմ կանգնելու են ջիհադականները, մենք պետք է ունենանք բանակ, որի ոգեղեն մակարդակը կգերազանցի նրանց: Ջիհադականների կարգախոսն է` «Պետք է ավելի ձգտել մեռնել Ալլահի ճանապարհին, քան ուրիշները ցանկանում են ապրել… Միայն այդ դեպքում ձեռք կբերենք գերակայություն»,-նշեց կրոնագետը:

Վարդան Խաչատրյանի խոսքով. «Մեզանում մատների արանքով են նայում այս ամենին եւ համարում, որ օդում խոսում ենք: Ջիհադականները պետք է համոզված լինեն, որ սա այն տարածքը չէ, որտեղ կարող են մտնել եւ մարդկանց տասնյակներով մորթել… Նրանք ուրիշ բանի սովոր չեն, դա նրանց կյանքն է: Ջիհադականներն ուր գնում են` ձերբակալվում են: Թուրքիան ի վիճակի չէ նրանց իր ներսում պահել, որովհետեւ վտանգավոր զանգված է: Եթե կա հակամարտություն, որը Թուրքիան փորձում է հնարավորինս խթանել, ի՞նչ է լինելու…

Ոչ ոք չի թաքցնում, որ Սիրիայի երկնքում ռուսական կործանիչի խփվելու օրը, շեշտում եմ` հենց այդ օրը, Թուրքիայի վարչապետ Դավութօղլուն եւ Չավուշօղլուն գնում են Ադրբեջան` հայտարարելով, որ եկել են հայ-ադրբեջանական խնդիրների շուրջ խոսելու: Հետո տեղեկություն է տարածվում, որ նրանք փորձել են հնարավորինս հրահրել եւ պահանջել Ադրբեջանից, որ լայնամասշտաբ պատերազմ սկսի Հայաստանի դեմ: Դա բոլորը հաստատեցին, այդ թվում` Ռուսաստանը, ԱՄՆ-ն, Եվրամիությունը: Այդ ժամանակ տանկերը հարձակվեցին մեր դիրքերի վրա:

Երկրորդ փուլում, երբ Ալիեւը գնաց Էրդողանի մոտ, դիվերսիոն խմբերը հարձակվեցին: Հիմա Թուրքիայի եւ Ադրբեջանի միջեւ կրկին շփում է եղել, եւ երեկ եղավ այն, ինչ եղավ…

Որքա՞ն խաբենք մեզ, որ բան էլ չկա, որ բան էլ չի լինելու…»,-ասել է Խաչատրյանը: 

ԱՎԵԼԱՑՆԵԼ ՄԵԿՆԱԲԱՆՈՒԹՅՈՒՆԸ