Ինչո՞ւ է Ադրբեջանը հրետակոծում հայկական բնակավայրերը

25 Սեպտեմբերի 2015

Երեկ գիշերը Ադրբեջանի զինված ուժերը վերսկսեցին Տավուշի մարզի բնակավայրերի գնդակոծությունն ու հրետակոծությունը: Ընդ որում, ի տարբերություն սեպտեմբերի սկզբի, այժմ հրետակոծություններն առավել ինտենսիվ են և դրանց արդյունքում արդեն 3 խաղաղ բնակիչ է զոհվել: Բացի այդ, այս անգամ մի քանի արկ հասավ անգամ Նոյեմբերյան քաղաքի բնակելի թաղամասեր, ինչ բավականին խորհրդանշական է:

Պատերազմի և ահաբեկչության տարբերությունը

Նախ հարկավոր է արձանագրել, որ թե´ սեպտեմբերի սկզբին և թե´ այժմ ադրբեջանական կողմը հիմնականում ռմբակոծում է հենց Տավուշի մարզը (և ոչ Արցախը) և հենց խաղաղ բնակչությանը (և ոչ Զինված ուժերի դիրքերը):

Բացի այդ, հայտնի է, որ զինված ուժերի դեմ առավել արդյունավետ է հարձակում գործել լուսադեմին, իսկ խաղաղ բնակչության դեմ՝ ցերեկը (երբ մարդիկ դրսում են և պաշտպանված չեն բեկորներից): Իսկ ադրբեջանական կողմը հրետակոծություններն իրականացնում է ցերեկը կամ երեկոյան, իսկ գիշերը կրակը դադարում է և դրանով ևս ապացուցվում է, որ իր թիրախը հենց խաղաղ բնակիչներն են և այդ կերպ փորձ չի արվում որևէ ռազմական հարց լուծել:

Այդպիսի գործողությունները կոչվում են ոչ այլ կերպ, քան ահաբեկչություն (բռնությունների գործադրում որոշակի քաղաքական կամ այլ նպատակով):

Նպատակը

Արդեն վաղուց որևէ մեկի համար գաղտնիք չէ, որ հրետակոծություններն ակտիվանում են Ղարաբաղյան հակամարտության շուրջ բանակցություններին նախորդող օրերին: Բացառություն չէ նաև այժմ՝ մոտակա օրերին սպասվում է Նալբանդյան-Մամեդյարով հանդիպումը:

Ակնհայտ է, որ հրետակոծություններով Բաքուն փորձում է առավելագույնս խուճապ տարածել Հայաստանում, որպեսզի այդ կերպ ճնշում գործադրի պաշտոնական Երևանի վրա:

Սակայն, քանի որ Բաքվում գիտակցում են, որ մի քանի գյուղերի ռմբակոծման արդյունքում որևէ մեկը Ադրբեջանին հողեր չի վերադարձնելու, հարց է առաջանում՝ ի՞նչ է իրականում ուզում Ադրբեջանը ստանալ:

ԵԱՀԿ Մինսկի խմբի ճակատամարտը

Վերջին տարիներին ռուս-ադրբեջանական հարաբերություններն էականորեն ջերմացել են, ի տարբերություն Եվրամիության ու ԱՄՆ-ի հետ Բաքվի հարաբերությունների, որոնք խիստ վատթարացել են:

Այս ֆոնին արդեն զարմանալի չէ, որ Ադրբեջանը փորձում է ձերբազատվել ԵԱՀԿ Մինսկի խմբից՝ բանակցային գործընթացը շարունակել միայն Ռուսաստանի միջնորդությամբ: Այլ կերպ ասած՝ Բաքուն փորձում է ձերբազատվել Ֆրանսիայի և ԱՄՆ-ի միջնորդությունից, քանի որ այդ երկրների հետ հարաբերությունները, մեղմ ասած, բարեկամական չեն։ ԵՄ-ն արդեն պատրաստվում է պատժամիջոցներ կիրառել Ադրբեջանի դեմ, ԱՄՆ-ն այդ երկիրն անվանում է մարդու իրավունքները չհարգող, մինչդեռ Ռուսաստանը ամեն տեսակ աջակցություն է ցուցաբերում Բաքվին:

Հայաստանին, բնականաբար, ֆորմատի այսօրինակ փոփոխությունը ձեռք չի տալիս, քանի որ Ֆրանսիան և ԱՄՆ-ն շահագրգռված չեն տարածաշրջանում պատերազմի վերսկսմամբ և ավելի բարեկամական են տրամադրված Հայաստանի նկատմամբ, քան Ադրբեջանի:

Հարկ է նաև նկատել, որ այս հրետակոծությունները անցնում են Նյու Յորքում ԵԱՀԿ-ի հետ ՀՀ ԱԳ նախարար Էդվարդ Նալբանդյանի հանդիպման ֆոնին և ցանկացած պարագայում հստակ ուղերձ են պարունակում առ այն, որ ԵԱՀԿ-ն չի կարող ազդել հակամարտության վրա և պետք է փոխել ձևաչափը:

Ռուս խաղաղապահներ

Սակայն հնարավոր է, որ խնդիրը ոչ միայն ԵԱՀԿ Մինսկի խմբի շուրջ է: Չի բացառվում, որ Ադրբեջանը Ռուսաստանի հետ ինչ-որ համաձայնության է եկել և փորձելու է իրավիճակը ինչ-որ կերպ փոխել Լեռնային Ղարաբաղ ռուսաստանյան խաղաղապահներ բերելով:

Այդ կերպ Ադրբեջանը հույս կունենա հեռանկարում պայմանավորվել Մոսկվայի հետ և ստանալ Արցախը:

Բայց Արցախ խաղաղապահներ բերելու համար նախ պետք է հայկական կողմի համաձայնությունը… Կամ, միգուցե՝ անգամ խնդրանքը:

Իսկ այդպիսի խնդրանք կարելի է ստանալ հայկական խաղաղ բնակչությանը ռմբակոծելով, որպեսզի պաշտոնական Երևանը մի օր իր «ռազմավարական դաշնակցին» խնդրի խառնվել իրավիճակին:

Սակայն Հայաստանի իշխանությունները դիմադրում են այդ պլաններին և որևէ պարագայում չեն խնդրում Հայաստանի անվտանգության «երաշխավոր» Ռուսաստանին խառնվել իրավիճակին: Անգամ ավելին, Սերժ Սարգսյանը այդպես էլ չբարձրացրեց այդ հարցը ՀԱՊԿ գագաթնաժողովին, ինչը նշանակում է, որ պաշտոնական Երևանը չի ցանկանում ավելացնել Մոսկվայի ներգրավվածությունը հայ-ադրբեջանական հարաբերություններին:

Դանիել Իոաննիսյան

«Իրազեկ Քաղաքացիների Միավորում»

ԱՎԵԼԱՑՆԵԼ ՄԵԿՆԱԲԱՆՈՒԹՅՈՒՆԸ

ՍՈՑԻԱԼԻԶՄ .AM

 

Հայաստանի Հանրապետություն
ք. Երևան,
(+37410)
E-mail: info@socialism.am

Բոլոր իրավունքները պաշտպանված են: Մեջբերումներ անելիս հղումը socialism.am-ին պարտադիր է: Կայքի հոդվածների մասնակի կամ ամբողջական հեռուստառադիոընթերցումն առանց socialism.am-ին հղման արգելվում է: Գովազդների բովանդակության և մամուլի տեսության համար կայքը պատասխանատվություն չի կրում: